شفت عقرب الساعات على 9

فى بادره من نوعها و التى تعطى مؤشر عالى على ارتفاع سعر الجنيه فى السوق العالميه
هو انى صحيت النهارده الساعه 9 الصبح
معجز تعطى نظره امل لخروج امريكا من العراق ،
و ده بعد تقريبا اكتر من اربع شهور مشفتش عقرب الساعات على 9 او حتى 12
من بعد ما اخت الاجازه
و لاول مره محتاجتش القوه العسكريه الى بتصحينى كل مره ،
قمت و اخت ما يدعى بشاور و بعدين الفطار
الوجبه الى بقالى سنه مشفتهاش
بعد ما كانت بصحى على وجبه العشا على طول
و بعد كده فتحت التلفاز
تلك الجهاز الى مش بستعمله الا فى الاعياد
و ده بعد ما اخترعو الكمبيوتر
شيكت على قنوات الدش كلها
و قولت اشوف اولادنا فى التلفزيون المصرى اخبرهم ايه
و معانا القناه التانيه و فليم عربى قدييييييييييييم
قعدت اتفرج عليه و حاسس انى بعد كده هنزل اجيب الجرنال
و طبق الفول من عند الواد دقدق،
خلص الفليم
شعور بالفراغ قمت رايح مصحى البيت كله
هع هع هع هع
انا بلطجى
كله قام طبعا
و اولهم ابويا الى قام على النبره المعتاده
انت لسه صاحى خليك لما الزفت ده يخرب عقلك
قصده على الكمبيوتر
ضربو الاعور على عينه يا عم الحج
بداء اذان الجمعه
ونزلت و كانت اول مره اشوف الشمس و الدنيا منوره كده
و رحت على الجامع على طول
و الى كانت اول مره اكسر فيها العاده و اغير الجامع الى بصلى فيه
و اول ما دخلت و كانت اول مره اشوف فيها الشيخ و هو بيقول الخطبه
كنت عايز احضنه و ابوسه
انت فين يا راجل من زمااان
خلصت الصلاه و شعور بالظقطاطه بانى عملت ده كله و لسه الساعه 2الضهر
و رجعت مع اصحابى الى منهم جرى على البيت عشان الحر
ها يا حلاوه
و رجعت البيت و اول مره اتابع الحركه فى البيت و الشارع بعد الصلاه
لانى كنت ديما برجع على السرير اكمل نوم على طول
دا اذا صحيت اصلا
لانى اتبرمجت على الصحيان الساعه 7،8 بليل
و تقوم بقى من النوم حاسس بفجوه زمانيه
بينك و بين الناس الى صحايه دى
تحس انك عبيط و مش فاهم حاجه
انما الصحيان بدرى طلع نعمه و الى يكره يقع فى الترعه
و انتها يومى الساعه 12
و حاسس انى كنت مطبق تلات ايام ورا بعض
خلاص مفيش احلى من الصحيان بدرى
مفيش سهر بعد خمسه الفجر
او سته.. يعنى
عشان ننام بدرى و تحس باليوم من اوله و تستمتع بيه
ولا ايــــــــــــــــــــــــــــه
يا حج كامل